2024-nji ýylyň 16-njy iýulynda Türkmenistanyň Birleşen Arap Emirliklerindäki Ilçisi Serdar Garajaýew Yrak Respublikasynyň Ilçisi doktor Mudhafar Al Jbori bilen Yragyň Abu-Dabi şäherindäki Ilçihanasynda duşuşdy.
Taraplar Türkmenistan bilen Yragyň arasyndaky gatnaşyklaryň häzirki ösüşini, şol sanda Yragyň Daşary işler ministriniň orunbasarynyň Türkmenistana gurnalan soňky saparyny we Türkmenistandan Yrak Respublikasyna Eýran Yslam Respublikasynyň üsti bilen «SWAP» meýilnamasy boýunça tebigy gazy satmak hakynda gol çekilen şertnamany ara alyp maslahatlaşdylar.
Mundan başga-da, taraplar geljekde ikitaraplaýyn hyzmatdaşlygy, esasan hem energiýa, ulag we nebit-himiýa pudaklarynda hyzmatdaşlygyň mümkinçiliklerini ara alyp maslahatlaşdylar. Ykdysadyýet, medeniýet we bilim ýaly dürli ugurlarda hyzmatdaşlygy güýçlendirmek üçin diplomatik işleriň dowam etdiriljekdigini ylalaşdylar.
Ara alyp maslahatlaşmagyň esasy mowzugy, Yrak Respublikasynyň ýolbaşçylarynyň 2024-nji ýylyň oktýabr aýynda Türkmenistanyň Aşgabat şäherinde geçiriljek Magtymguly Pyragynyň 300 ýyllygyna bagyşlanan Halkara döwlet we hökümet baştutanlarynyň forumyna gatnaşmagy boldy.
